Ведаць сваю родную мову — гэта абавязак кожнага з нас.
Дзяржаўнымі мовамі Беларусі з'яўляюцца беларуская і руская. Аднак, менавіта беларуская мова робіць нас непаўторынымі і адрознівае ад іншых народаў свету. На жаль, сёння вельмі рэдка можна пачуць прыгожую і правільную родную мову на вуліцах. Яшчэ радзей яе можна пачуць ад сучасных дзяцей. Але неабходна памятаць, што нават, калі вам больш падабаецца руская мова, ваш абавязак як беларуса і проста адукаванага чалавека — ведаць, разумець і ўмець падтрымаць размову на беларускай мове.
Дзеля таго, каб родная мова не пагасла, вельмі важна пачынаць вывучаць яе яшчэ з малентства, а менавіта з дзіцячага садка, дзе добра падрыхтаваныя педагогі раскрыюць дашкольнікам усю яе прыгажосць і непаўторнасць.
На сённяшні дзень у нашым горадзе не ўсе садкі маюць беларускамоўныя групы. Але на шчасце адна з такіх груп ужо 5-ы год працуе ў садку №35 г. Ліда. У гэтым годзе выхаванцамі групы (яе нумар 8) з'яўляюцца 23 шчырых і ўсмешлівых дзіцяці ва ўзросце ад 4 да 5 год. Увогуле, навучанне ў беларускамоўнай групе пачынаецца з трохгадовага ўзросту і працягваецца да самага выпуску.
"Вельмі крыўдны той факт, што некаторыя бацькі з асцярогай успрымаюць беларускамойную групу, — расказвае загадчыца дзіцячага сада №35 Яцкевіч Ірэна Уладзіславаўна, — яны лічаць, што іх дзецям будзе вельмі цяжка ў школе, таму што практычна ўсе школы рускамоўныя. Але яны памыляюцца... Сучасныя дзеці ўспрымаюць беларускую мову як замежную. Таму, калі яны пераходзяць на наступную ступень навучання, урокі беларускай мовы і літаратуры даюцца ім вельмі цяжка. Вось і атрымліваецца, што, ідучы ў першы клас, нашы дзеці толькі-толькі пачынаюць вучыцца дасканала размаўляць, пісаць і чытаць на роднай мове, што непазбежна вядзе да пагаршэння адзнак. Абавязак нашага садка быў адкрыць такую групу, хаця б па той прычыне, што большасць нашых выпускнікоў навучаецца ў суседняй школе №15, у якой ёсць беларускамоўны клас”.
Вучыць дзяцей беларускай мове — вельмі цяжкая праца. Гэта звязана з тым, што бацькі выхаванцаў ў большасці размаўляюць на рускай мове, таму ведам і навыкам дзяцей няма падмацавання ў хаце.
«Пры арганізацыі вучэбнага працэсу з дашкольнікамі ўсё больш даводзіцца выкарыстоўваць супастаўляльны метад навучання, пры якім засваенне беларускай мовы адбываецца на аснове аналізу, супастаўлення і абагульнення дзвюх моўных сістэм (беларускай і рускай). Такі метад заснаваны на мадэлі пераносу моўных навыкаў з рускай мовы на беларускую. Павагу да мовы выхоўваем на занятках, праз фальклор і народныя гульні, творы беларускіх пісьменнікаў, знаёмства с беларускай культурай. Галоўная мэта — каб дзеці ва ўзросце 6 год ведалі, разумелі і адчувалі прагажосць беларускай мовы», — тлумачаць выхавацелі.
Канешне, праца па навучанню дзяцей роднай мове адбываецца ва ўсіх групах, але ў беларускамоўнай яна куды глыбейшая.
Працуюць у групе №8 два таленавітыя і маладыя педагогі Конан Кацярына Леанідаўна і Чэкан Ганна Іосіфаўна, якія, між тым, па сваёй адукацыі з'яўляюцца выкладчыкамі беларускай мовы і літаратуры. Памочнік выхавацеляў — шчырая і актыўная жанчына Каспорская Аксана Ўладзіміраўна. Усе разам ствараюць добрую каманду і моцны калектыў, у якім так прыемна знаходзіцца дзецям.
Карыстаючыся магчымасцю, калектыў i адмiнiстрацыя вельмі хочуць падзякаваць бацькам групы №8 за аказаную дапамогу ў правядзенні рамонтных прац. Дзякуючы ім, у новым навучальным годзе выхаванцаў сустрэла ўтульная і па-сапраўднаму беларуская "хатка". Агульнымі намаганнямі бацькоў і працаўнікоў дзіцячага садка група атрымала сучасны выгляд, які поўнасцю адюстроўвае спецыфіку выхавання ў ёй.
Увогуле, бацькі ўсіх выхаванцаў сапраўдныя малайцы — вельмі падтрымліваюць, і каманда дзіцячага сада шануе гэта. У сваю чаргу педагогi заўсёды імкнуцца ісці насустрач бацькам, а галоўнае — любяць і выхоўваюць дзяцей, як сваіх.
Вучэбны год толькі пачынаецца. Выхаванцы сталі на год старэйшымі. А гэта значыць, што наперадзе ў нас яшчэ шмат плённай працы. Поспехаў працаўнікам дзіцячага сада!
© «Бізнес-Ліда», 2015.
