Галоўнай дзеяй свята быў конкурс «Працоўная сякера», у якім прынялі ўдзел прадстаўнікі Лідскага і Фалькавіцкага лясніцтваў.
У другі раз у аграгарадку Тарнова Лідскага раёна прайшло свята сякеры. Да кожнай каманды-прафесіяналаў далучыліся аматары сякеры з мясцовых жыхароў. Спачатку удзельнікам патрэбна было ручной пілой напілаваць калодак, а затым насячы дроў. Наступным заданнем завастрыць бярозавыя калы «пад аловак».
Цікавасць, а разам і хваляванне ў гледачоў вызваў іспыт на трапнаць і зоркасць. Патрэбна было рассекчы звычайныя запалкі ўздоўж (запалкі былі размешчаны вертыкальна на драўляных дысках і прадстаўлены кожнаму ўдзельніку).
Спатрэбілася ўменне і нават сіла ў забіванні цвікоў адваротным бокам сякеры. Гаспадыні здзіўляліся, што так дробна сякерай можна пашынкаваць капусту. Галоўны прыз — мяшок зерня падзялілі паміж сабою Звярко Сяргей з Лідскага лясніцтва і Хацукевіч Генадзь з Фалькавіцкага. Прыз сімпатыі гледачоў атрымаў Анатоль Султанаў з Ліды.
Настрой задавалі калектывы аматарскай творчасці Тарноўскага Дома культуры і госці з аграгарадка Геранёны Іўеўскага раёна. Усе прысутныя змаглі пачаставацца і ацаніць на выдатна традыцыйную кашу «з сякеры», рэцэпт якой ведае толькі загадчыца філіяла «Тарноўскі Дом культуры» ДУ «Лідскі раённы цэнтр культуры і народнай творчасці» Святлана Антонік. Дарэчы, яна ж ініцыятар і галоўны арганізатар гэтага мерапрыемства, распавядае Ганна Некраш, вядучы метадыст ДУ "Лідскі раённы цэнр культуры і народнай творчасцi.
«Бизнес-Лида», 2016.
