Кіраўніцтва ідэалягічнага аддзелу Лідзкага райвыканкаму накіравала на прадпрыемствы і ўстановы цыркуляр аб правядзеньні падпіскі на ІV квартал 2016 году.
Дакумэнт падпісаны намесьнікам старшыні Лідзкага райвыканкаму Віктарам Пранюком.
Кіраўнікі раённых устаноў мусяць правесьці кампанію «добраахвотнай» падпіскі на шэраг дзяржаўных газэт і пры канцы месяца даць раённым ідэолягам справаздачу з ксэракопіямі падпісных квітанцыяў. Колькасьць выпісаных выданьняў павінна складаць ня меней за палову ад сьпісавага складу працоўных калектываў.
У сьпіс рэкамэндаванай прэсы ўваходзяць «Советская Белоруссия», «Рэспубліка», «Звязда», «Гродзенская праўда», «Лідская газета» і іншыя, распавядае сайт «Радыё Свабода».
Журналiсты звярнулiся да Міхаіла Карповіча
Звычайна ў падобных выпадках чыноўнікі абвяргаюць факты сваёй падпісной актыўнасці. Аднак старшыня Лідскага райвыканкама Міхаіл Карповіч у адказ на зварот прэс-сакратара ГА «Беларуская асацыяцыя журналістаў» Барыса Гарэцкага не стаў адмаўляць удзелу чыноўнікаў у справе падпісной кампаніі, пiша baj.by. Міхаіл Карповіч тлумачыць неабходнасць арганізацый падпісвацца на дзяржаўныя выданні наступным чынам:
— У сувязі з тым, што інфармацыя па пытаннях правядзення адзіных дзён інфармавання насельніцтва да чальцоў інфармацыйна-прапагандысцкіх груп публікуецца ў сродках масавай інфармацыі, а грамадзяне працягваюць уздымаць адны і тыя ж пытанні, якія неаднаразова асвятляліся ў рэспубліканскіх, абласных і раённых выданнях, Лідскі раённы выканаўчы камітэт звярнуў увагу кіраўнікоў на неабходнасць актывізацыі падпісной кампаніі у працоўных калектывах.
Арганізацыя падпісной кампаніі спрыяе правядзенню інфармацыйнай работы з насельніцтвам на больш высокім узроўні, — гаворыцца ў адказе.
«Бизнес-Лида», 2016.
