21 июня 2016

«Восем начлегаў, дзясяткі кілаграм крупаў і дарога ў 250 км»

Другая па ліку пілігрымка ў Будслаў з Ліды распачнецца сёлета 23 чэрвеня. Дарога ў Нацыянальны санктуарый Маці Божай Будслаўскай, як і летась, складзе дзевяць дзён. 

На сваім шляху пілігрымы будуць спыняцца на начлег у Ліпнішках, Юрацішках, Вішневе, Кібуцях, Маладзечне, Любані, Касцяневічах і Ваўкалатцы.

Лідская пілігрымка, як і пілігрымка «Баранавічы-Будслаў», стане самай доўгай па працягласці з усіх, якія арганізуюцца ў гэтым годзе.

Як адзначыў галоўны арганізатар дзевяцідзённага шляху, вікарый парафіі Узвышэння Святога Крыжа ў Лідзе (фары) кс. Уладзіслаў Сурвіла (на фота знiзу — святар з рацыяй), што сёлета чакаецца ўдзел больш за 100 пілігрымаў.

«Раней у Будслаў мы хадзілі ў складзе іншых пілігрымак — “Смаргонь-Будслаў”, або “Гудагай-Будслаў”. Летась наша парафія ўпершыню арганізавала асобную пілігрымку для вернікаў Ліды. Сёлета нашымі пілігрымамі стануць каля 100 вернікаў, па дарозе ж да нас будуць далучацца і іншыя ахвотныя — перадусім у тых месцах, дзе мы будзем спыняцца на начлег».

Святар адзначае, што сёлета пілігрымка «Ліда-Будслаў» у адрозненні ад мінулага года, калі яна арганізоўвалася ўпершыню, пройдзе ўжо па знаёмым шляху.

«Гэтым разам мы ўжо больш ведаем пра дарогу, якой ідзём. Таксама ведаем, як лепш арганізаваць час, каб адпачыць. У многіх вёсках, праз якія ідзём, іх жыхары ўжо прымалі удзельнікаў мінулагодніх пілігрымак, таму сустрэча з намі не стане для іх неспадзяванкай».

Паводле слоў святара, удзельнікі пілігрымкі вучацца быць аўтаномнымі і бяруць з сабою намёты, каб у выпадку чаго быць падрыхтаванымі да начлегу пад адкрытым небам.

Падарожжа ў Будслаў, якое займае 9 дзён і ахоплівае адлегласць у 250 км, патрабуе і дастатковай колькасці прадуктаў для палявой кухні, якая будзе рыхтаваць пасілкі для пілігрымаў.

Ксёндз Уладзіслаў дадае, што ў некаторых вёсках пілігрымаў кормяць самі вяскоўцы. Тым не менш для палявой кухні пілігрымкі «Ліда-Будслаў» ужо сёння зроблены запасы ў дзясяткі кілаграмаў самых розных крупаў (грэчка, рыс), макаронаў і дзясяткі банак з тушонкаю.

Арганізацыйны ўзнос за ўдзел у пілігрымцы, як адзначае святар, складае 100 тысяч беларускіх рублёў. Спецыяльную майку пілігрыма можна набыць за 100 тысяч, кепка пілігрымкі «Ліда-Будслаў» — яшчэ 50 тысяч.

Паводле слоў кс. Уладзіслава, пасля пілігрымкі ў Будслаў лідскія вернікі маюць магчымасць крыху адпачыць і набрацца сіл: наступным пунктам у графіку многіх з іх значацца Тракелі, распавядае Catholic.by.

«Тракелі зусім побач ад Ліды, таму звычайна гэта пілігрымка ў адрозненні ад будслаўскай найкарацейшая, бо доўжыцца толькі дзень», — усміхаецца святар.


«Бизнес-Лида», 2016.

Если вы заметили ошибку в тексте, пожалуйста, выделите её и нажмите Ctrl+Enter

Комментарии 3

Чтобы написать комментарий нужно войти  или зарегистрироваться

Сергей , 21 июня 2016, 14:22#
Бог Вам у дапамогу! Лёгкай i вясёлай дарогi!
Павучок , 21 июня 2016, 20:12#
Эм, не вижу на фотках экипировки, или будет сопровождение на авто?
Галыгин , 21 июня 2016, 22:48#
Пiлiграмау и я, Щучын-Тракелi 2007. Бог вам у дапамогу, сiл и добрага надвор'я!