Сёлета Будслаўскі фэст пройдзе 4 і 5 ліпеня пад дэвізам: «Міласэрнасць Божая — давяраем Табе». Беларускія католікі адкрылі летні сезон пілігрымак. Многія вернікі з розных куткоў краіны вырашылі дабірацца на традыцыйны штогадовы фэст пешшу.
Першымі выйшлі католікі з Ліды і Баранавічаў – яны ў дарозе з 26 чэрвеня. Салезіянская моладзевая евангелізацыйная пілігрымка адправілася са Смаргоні 29 чэрвеня. І гэта толькі малая частка паломнікаў: іх чакаюць з Мінска, Ракава, Пастаў, Гродна, Вілейкі, Глыбокага. Хтосьці дойдзе пешшу. Хтосьці будзе ехаць на веласіпедах. У 2024 годзе ў Будслаў пешшу і на веласіпедах прыбылі каля 2000 каталікоў.
Падчас урачыстасцяў у Нацыянальным санктуарыі ў Будславе адбудзецца прысвячэнне Мінска-Магілёўскай мітраполіі, гэта значыць Касцёла ў Беларусі, Божай Міласэрнасці і Беззаганнаму Сэрцу Найсвяцейшай Панны Марыі.
На Беларускім тэлебачанні плануецца прамая трансляцыя цэлебрацый з Будслава.
Праграма фэсту
4 ліпеня, пятніца
14:00-17:00 — сустрэча і прывітанне пілігрымаў (пробашч будслаўскай парафіі ксёндз Дзмітрый Дубовік),
18:00 — святая Імша (галоўны цэлебрант — біскуп Андрэй Зноска),
20:00 — Акафіст у выкананні хору Грэка-каталіцкай Царквы,
20:30 — Марыйныя Нешпары (Меншыя Браты Капуцыны),
21:00 — Крыжовы шлях (Айцы Кармэліты Босыя),
22:00 — Моладзевая праграма «Моладзь да моладзі» (адказны за душпастырства моладзі ў Мінска-Магілёўскай архідыяцэзіі ксёндз Андрэй Бурак),
23:30 — працэсія з копіяй абраза Маці Божай Будслаўскай.
5 ліпеня, субота
00:00 — святая Імша (галоўны цэлебрант — біскуп Алег Буткевіч),
02:00 — адарацыя Найсвяцейшага Сакрамэнту (Каардынацыйная група настаяцеляў і прадстаўнікоў манаскіх супольнасцяў),
06:00 — Боская літургія Грэка-каталіцкай Царквы ў візантыйскім абрадзе (галоўны цэлебрант — Апостальскі адміністратар для грэка-католікаў у Беларусі архімандрыт Сяргей Гаек),
07:00 — Гадзінкі аб Беззаганным Зачацці Найсвяцейшай Панны Марыі (Будслаўская парафія),
08:00 — святая Імша ў базыліцы (галоўны цэлебрант — біскуп Юрый Касабуцкі),
09:30 — Фацімскі ружанец (Легіён Марыі),
Акт прысвячэння Беззаганнаму Сэрцу Марыі Мінска-Магілёўскай мітраполіі (біскуп Аляксандр Яшэўскі SDB),
10:30 — тэматычная канферэнцыя: «Беззаганнае Зачацце: юбілей 170-годдзя догмату» (ксёндз Канстанцін Анашка МІС),
11:30 — святая Імша (галоўны цэлебрант — Апостальскі нунцый арцыбіскуп Іньяцыё Чэффаліа; прамая трансляцыя на тэлеканале Беларусь 3), Эўхарыстычная працэсія і Акт прысвячэння Божай Міласэрнасці і Беззаганнаму Сэрцу Марыі Мінска-Магілёўскай мітраполіі (арцыбіскуп Юзаф Станеўскі).
На працягу ўсяго фэсту будзе магчымасць ушанавання вернікамі цудадзейнага абраза Маці Божай Будслаўскай і малітвы перад ім.
«Бизнес-Лида», 2025
