Самыя смачныя стравы з цёртай бульбы абяцаюць арганізатары гасцям фестывалю «Вараноўскі дранік», які 27 верасня пройдзе ў гарадскім пасёлку Воранава, аб гэтым поведамляе Воранаўскі райвыканкам.
«Аматараў бульбы чакае сапраўдны бульбяны бум: мноства дранікаў па розных рэцэптах і іншых страў з цёртай бульбы, а таксама тэматычныя конкурсы і кулінарныя майстар-класы», — адзначылі арганізатары. «На шматлікіх інтэрактыўных пляцоўках можна будзе праявіць сябе і паказаць свае таленты».
Пра бульбяныя традыцыі раскажа тэматычная пляцоўка «Бульбачку вараць, бульбачку параць...», дзе можна будзе паспрабаваць духмяныя, з полымя ды з жару стравы з цёртай бульбы, прыгатаваныя па рэцэптах нашых бабуль і прабабуль сельскагаспадарчымі прадпрыемствамі Воранаўскага раёна. Госцi гэтай пляцоўкі пасля дэгустацыі самі абяруць пераможцу.
На пляцоўцы «Якасць-бульба! Лепшы сорт!» будуць чакаць прафесійныя селекцыянеры Гродзеншчыны, якія дапамогуць вызначыцца з выбарам. Бульбу рознага сорту можна будзе набыць на кірмашы «Урадзіла бульбачка».
Сустрэнуць гасцей свята на сваім падворку «Байк-дранік» брутальныя байкеры, якія пачастуюць самымі смачнымі бульбянымі блінамі ўласнага прыгатавання. Навучыцца нечаму новаму можна будзе ў воранаўскіх гаспадынь, якія правядуць кулінарныя майстар-класы на пляцоўцы «Дранік-гаспадар». Не менш гасцінныя гаспадыні Гродзенскай вобласці ад душы пачастуюць на пляцоўцы «Дранік са смакам традыцый». Усёй сям'і будзе цікава на інтэрактыўнай пляцоўцы «Дранік-пікнік».
А галоўнай стравай дня стануць тры дранікі-гіганты. Іх выпякуць на вачах гледачоў.
Праграма бульба-фэсту «Воранаўскі дранік»
«Бизнес-Лида», 2025
